رحلتي الى تركيا.. الفكرة والحجز للطيران والفنادق

نَزلت طيران ناس 

flynas.com

وهو طيران خاص في السعودية

عروض في شهر نوفمبر 2013

جامدة جدا

خلتنا نقرر نحجز عمرة 

ونحجز نروح المدينة

وكنا عايزين نروح مكان نتفسح فيه بس مش عارفين فين

قعدنا ندور في كل البلاد اللى بتروحها طيران ناس في شهر ابريل 

عشان ده شهر عيد جوازنا الاول

وكان نفسنا نسافر بره في شهر العسل بس للاسف مكانش فيه ميزانية لده خالص

وبعد لف وتدوير وبلاد تحطنا وبلاد تشيلنا

لقينا اسعار السفر الى اسطنبول حلوة جدا رايح جاي احنا الاتنين 

حوالي 900 جنية

حجزنا واشترينا الفيزا على النت وديه كانت غلطة لان المصريين ملهمش فيزا نت الا بشروط

اقرا خطوات استخراج الفيزا للمصريين

قريت على النت في المنتتديات والمواقع

عن احسن اماكن تركيا 

عشان نقسم رحلتنا عليها

لان احنا مصريين وعندنا اثار ونهر 

يعني اسطنبول قريبة جدا من القاهرة

واحنا مش بتوع اثار ومتاحف يعني مش حنقعد اسبوع نلف نتفرج على حجارة ونقول وااااو

ولا محرومين من المراكب كفاية رحلة بوسفور وخلاص

وبعد اللف والتدوير 

لقيت احسن اماكن تركيا في الربيع هي 

اسطنبول وطرابزون وايدر واوزنجول

وعشان تسافر من اسطنبول لشمال تركيا 

يا اما عربية عشر ساعات

يا اما تركب طيارة لمطار طرابزون في الشمال التركي

ومنه الى ايدر واوزنجول وباقي القري التركية 

المليئة بالجبال الخضراء والطبيعة الساحرة 

طبعا في الصفار اللى الواحد عايش فيه في السعودية

والتلوث المميت في مصر

الشمال التركي كان لازم يتراح يعني حيتراح

عايزين شوية الوان
الوان يا ناس الوان ياهوووو
 بدل الابيض واسود اللى في مصر

وصفار البيضة اللى في السعودية

عايزين ننظف الرئة شوية

طبعا عشر ساعات رايح وعشرة راجع

وهو اسبوع يتيم

قررنا ناخد طيران داخلي من اسطنبول الى طرابزون 

واتكلف حوالي 

500 جنية

وكان طيران flypgs.com

طبعا حجوزات الطيران كل ما كانت بدري كان احسن 

فلازم ترتبوا كويس الرحلة وتعرفوا حتعملوا ايه وتحجزوا من بدري

نيجي للفنادق 

الفنادق متنوعة وكتير

وزي ما قلت كل ما كان الحجز بدري كل ما كان احسن بكتييييييييير

ادخل موقع 

 booking.com

وشوف الاسعار والاماكن القريبة من المزارات

واهم حاجة وفعلا اهم حاجة

اقرا الريفيوز (التعليقات)اللى الناس كاتباها

مهمة جدااااااااااااااااااااااااا

اهم اماكن اسطنبول بالنسبة ليا
اللى قريبة من السلطان احمد وفاتح وامينونو
بعيد عن تقسيم بسبب المشاكل الموجوده هناك والمظاهرات
وقريبة من المزارات قصر توبكابي والجامع الازرق وايا صوفيا 
وميناء امينونو اللى منه بتروح اي مكان
ومحطة الاتوبيسات والترام

واهم اماكن طرابزون وسط المدينة جنب مكاتب الحجز والمحلات والمولات
او جنب المطار لو مش حتقعد في طرابزون خالص

اما ايدر واوزونجول فهما صغيرين

احنا حجزنا في سلطان احمد فندق 
emin hotel
السعر

49 يورو

  477 جنيه الليلة

لا انصح بيه 
بس المنطقة حيوية وقريبة من كل شئ 
حاولوا تختاروا فندق قريب منه بس يكون احسن
ميزاته
قريب من كل شئ المزارات مشي-
الترام على اول الشارع مشي-
 محطة الباصات مشي  محطتين-
ميناء امينونو مشي محطتين-
واي فاي متوسط-
السعر مناسب-
عيوبه
دون المستوى لا يصح للعائلات نهائيا فيه تحت خمور -
ديكوراته سيئة-
 النظافة سيئة جدااااا يوجد بق في السرير ويسبب حبوب حمرا -
الحجرة ضيقة جدا زي 90% من فنادق تركيا-

قعدنا في اسطنبول يوم واحد وسافرنا تاني يوم باليل للشمال التركي

حجز فندق طرابزون في 
 karayel hotel
السعر

45 يورو

  438 جنيه الليلة

ميزاته

في ميدان طرابزون
بجانب مكاتب السياحة 
الفتاة في الرسبشن تتحدث الانجليزية 

ساعدتنا في حجز رحلات الى زيغانا- سوميلا- كاراجا- قرية هامسي
بمبلغ 45 ليرة فقط
مع شركة اسمها 
sumelatur.com
وطبعا انا كنت سالت في شركة تانية وقالولي 40 يورو
يعني 117 ليرة
حرامية اخر حاجة 
ومفيش فرق في الرحلة ديه والرحلة بتاعت الناس التانية
لاني كنت بشوف عربياتهم جنبنا خطوة بخطوة
ومزار بمزار

عيوبه
وجود بق برده في السرير-
كنا كاتبين على بوكينج ان الشيك ان حيكون الساعة 12 بليل
رحنا الفندق كان في الرسبشن واحد مش بيعرف انجليزي كويس-
وقالنا مفيش حجز اتلغي 
ياسيدي متلغاش واحنا قايلين حنيجي بليل مفيش وبيقول مفيش اوض
فضلنا وراه المهم لقي الحجز وكان متلخبط عشان مش طابع الحجز بتاعنا على ورقة

حجز فندق ايدر
Ayder Avusor Hotel
 السعر

60يورو 

175 ليرة

 585 جنيه الليلة

ميزاته

موقع على شلال مياه-
حواليه من كل مكان جبال خضراء-
بعيد عن الضوضاء-
ديكور الفندق رائع فهو كوخ من الخشب من دورين الارضي مطعم ورسيشبن والمطبخ-
والدور العلوي اربع حجرات للتاجير رائعة التصميم
بكل حجرة سرير كبير وسرير صغير
والحمام نظيف جدا وبه كل الامكانيات 
ده حتى حاطين شامبو بانتين وعاملين الدش اللى فيه راديو وانوار
حاجة اخر ألاجه 
:)
تعاون صاحب المكان معنا-
عيوبه
على تله عالية صعب الطلوع اذا نزلت منه الى المحلات-
ولكن صاحب المكان كان يعرض علينا التوصيل 
وجود النمل وذلك لوجوده وسط الزرع ويوجد بالفندق -
raid
وقد استخدمناه وتخلصنا من تلك المشكلة

اخر يومين محجزناش في حته
عشان نسيبها مفتوحه اذا كنا حنرجع طرابزون ومنها نروح اوزنجول 
ولا نروح اوزنجول على طول
وخصوصا اني قريت ان الحجز في اوزنجول في ساعتها ارخص من بوكينج

وفعلا اما رحنا لقينا الفرق في السعر
رحنا اوزنجول 
حجزنا فندق 
onal hotel
سالنا  فيه حجرة على البحيرة والجامع ؟؟
ايوه
بكام؟؟

 100 ليرة = 335 جنيه مصري

اوك اخدناها يوم ورجعنا طرابزون

ميزاته
بيبص على بحيرة اوزونجول الشهيرة والجامع
معقول جدا بالنسبة للسعر
عيوبه
 النت بطئ وبيقطع-
ديكوره بسيط-
وعشان كان اخر يوم لينا في تركيا
حبينا نقضيه على البحر
وكانت اخر فلوس معانا حجزنا بيها في 


NOVOTEL
طبعا سعره غالي واضطرينا نحول ريالات من اللى معانا احتياطي
بس عشان نبقى جربنا المدينة في اسطنبول
والخضرة في الشمال والجبال 
والبحر في نوفوتيل
ميزاته
كل حاااااااااااااااااااااااجة حلوة وروعة وفوق الوصف
عيوبة
غاااااااااااااااااااااااااااااالي جدا
130يورو
410 ليرة
 حوالي 1260 جنيه 

اللى اقدر اقوله عن الطيران في الحالتين كان سئ وفيه ضغط هوا جامد خصوصا في الطلوع والنزول
وحلها سدادات اذن ولبان  وده لان الطيارتين صغيرين

الفنادق 90 % من فنادق تركيا مش نظيفة والاوض صغيرة 
لو تقدروا تاخدوا ملايات يبقى حلو اوي 
وطبعا اشتروا اوف عشان يطرد الحشرات
وعشان بق السرير انا قريت ان النفتالين بيمشيهم بس بصراحة مش عارفة مجربتش

انظف فندق فيهم النوفوتيل الوحيد فعلا اللى مكانش فيه حاجة مش نظيفة ومستواه رائع
بس حرام الرحلة كلها تبقى فيه

 الا لووو...... بأه ده موضوع تاني
:D