رحلتي الى مملكة سيام (تايلند رايح جاي ) - بانكوك شيانغ ماي بوكيت

ورجعتلكم برحله جديدة الى بلاد الشمال

ايوه زي ما قريتوا كده بلاد الشيمال 💃

ستات ورجالة🙈

مش كفايه المعابد والبوذيه لاه وكمان شومال

------

 الرحلة  16 يوم مقسمة بانكوك شيانغ ماي بوكيت بانكوك

شخصين ورضيع خمس شهور ونص 👪

حجزنا الطيران علي القطرية واللي منصحش بيه الا لو رخيص اوي عن باقي شركات الطيران 

ليه باه؟

عشان علي الموقع في امكانية حجز الترانيزيت فرق ساعه واحدة

وطبعااااا الطيارة الاولي بتتاخر وبتفوتك الطيارة وتاخد اللي متاح بعدها واللي يبقي بعد خمس ساعات

وطبعا ديه حركة واطية 

عشان يبان ان وقت الرحله قليل وتجري تحجز معاهم 

وفي الاخر تلبس

...طيب ايه المشكلة؟ حالة فردية يا حجة

لااااا للاسف شفتها متكررة مع كذا حد واحنا رايحيين ووحنا راجعين 

وبيوقفوا موظف ماسك يافطه بالاسم والرحله ويقعد يعمل بيبي في دماغك

وفي الاخر مش حتاخد فرق الفلوس بتاعك 

بس غتتنا وغلسنا واخرنا اخدنا اننا نقعد في اللاودج 

----

وصلنا بانكوك واااه من الرطوبه 💦

اللي اسمعه بيشتكي من رطوبه اسكندرية ولا جدة حزعلوا 👿

---------

بصراحة الاجراءات واضحة وسريعة في مطار بانكوك وخلصنا واخدنا الشنط وطلعنا اخدنا تاكسي 

انصح بتنزيل 

app called "grap"

ابليكشن زي اوبر كده وايزي تاكسي وبترجم كمان صوت وكتابة من انجليزي لتايلندي

وممكن تطلب تاكسي او عربيه او موتوسيكل من عليها

حلوه وسعرها حلوووووووووو جداااا 

----------------

وصلنا الفندق

وكنا حاجزين 

Patumwan House

الحجرة نظيفة والسرير مريح وواسع وفيها زي ركن معمول فيه حوض كانه مطبخ وفيه كاتل 

الليلتين بـ 

SAR 359 = THB 3,300

المنطقة حلوه جدا جنب سيام مول وام بي كي MBK Shopping Center Bangkok

مشي مسافة قليلة اوي

انصح بيه 🌟

معلومة : بياخدوا 500 بهت تامين مفتاح وبيرجعوا عند الشيك اوت

الباب اللي بيوصل للاسانسير والحجرات مبيفتحش غير بمفتاح الحجرة 🔑

يعني امان 🔐

------

اول ليلة في بانكوك تايلند

رحنا مدام توسون في سيام ديسكفري اللي جوا المول

Madame Tussauds Museum Bangkok 

واكلنا بيتزا كومباني بيتزا الخضراوات الحاجه الوحيدة الحلال

ومكرونة معمولة بزيت نباتي

اشترينا سترولر للبيبي لان شيله صعب والشوارع مهيئة عادي 

ويفضل تجيبوا بتاعت البيبي معاكوا لانها غاليه هناك ومش موفره ولا حاجة ال شوبنج ال

او هاتوا واحده بتاعت السفر بتبقي سهله تتقفل وتتفتح ومش بتاخد مكان خصوصا في العربيات والمراكب

---------------

تاني يوم في بانكوك رحنا سفاري وورلد تبع شركه سياحة 

وكانت رحله لذيذة احلى حاجة فيها الزرافات 

Giraffe Feeding area in safari world Bangkok Thailand

 كميه كبيرة جداااا من الزرافات في السفاري منظر رائع وممكن تاكلهم (توكلهم مش تاكلهم ) بس بلاش تلمس لسانهم لانه مليان بكتريا 😷

وعرض القرود وعروض الفيلة ( اللى مدخلنهوش ) وعرض الدولفين وعرض كلب البحر

عرض الكابوي فااشل وعشانه مدخلناش عرض الفيلة

واخر الرحله جوله بالفان في السفاري وسط الحيوانات جوله سريعة كده 

( اي عرض فيه بني اّدمين من غير حيوانات فوته لو فيه عرض تاني في نفس الوقت )

وبليل رحنا استاتيك بانكوك

asiatique bangkok

Asiatique The Riverfront Bangkok

بعيد شويه وبيحتاج تاكسي

بس المكان حلو وعلى النهر محلات صغيره بتبيع حاجات مختلفة

وفي الاخر فيه زي سوق بيبيع اكل

اكلنا هناك سمك كانت تجربة لذيذة

-----

تالت يوم في تايلند سافرنا لشيانغ ماي

طيران اسيا وفي كل الطيران الداخلي اشترينا وزن 

وديه كانت غلطة اني جبت لبس كتير عشان مغسلش

وفي الاخر طلع الغسيل رخيص هناك وبياخدوا اللبس ويرجع تاني يوم الكيلو بـ 40 او 50بهت

كده كده في الداخلي بتشتري وزن بس حاول تصغر الوزن

----------

كنا حاجزين في شيانغ ماي فندق

De Klang Vieng

الفندق زي بيت ماسكة شاب مسيحي ومامته

الحجرة نظيفة والحمام حلو اوي

ومسافة 60بهت من النايتت بازار او ممكن تتمشي شويه 

----------

اول يوم شيانغ ماي 

نزلنا النايت بازار بليل وكان حلو واسعاره حلوه واشترينا ساعتين 

وايشارب وتي شيرتات

وانصح بالشرا من هناك ارخص كتيررر من بوكيت

حتي التكاسي ارخص والاكل كمان

رحنا مطعم حلال جااااااااامد واكله حلو وسعره مناسب 

اسمه بابليون 

اكلنا فيه شوربه وفراخ ورز وخبز وسلطة فتوش

وحاجات كتيييير

اديله 5 من 5 ⭐

------

تاني يوم في شيانغ ماي حجزنا رحله للفيلة 

اللي هو ميتم الفيله مش بيخلوهم يعملوا عروض ولا حد بيركبهم

كل اللي بيتعمل انك بتاكلهم وبتحميهم وتتصور معاهم وكده

Elephant Nature Park Chiang Mai thailand

كانت رحله جميلة والمرشد كان شاب لذوذ 

والشباب اللي كانوا معانا كانوا كلهم صغيرين وروحهم حلوه

اكلنا هناك وطلعنا علي شلال

بينزل علي بركة كده

والمكان علي طبيعته ( يعني مش سياحي)

السلالم للمكان كتير اوي ومتعبة متعبه يعني 👴👵

وزوجي وقع من فوق الشلال الحمدلله ربنا ستر 

فخلوا بالكوا الصخور بتزحلق جدااا

والارتفاع حوالي 10 متر

ومش مستاهله المخاطره بحياتكوا 

كفايه تشوف المنظر وتستحمي في البركة وتطلع متوسخ 💩

بليل رحنا اكلنا في مطعم اسمه الريم الاماراتي

بصراحة معجبنيش وسعره عالي جدا على الاكل

واتاخر في تقديم الاكل مع ان مكانش فيه حد غيرنا 

وبعيد عن النايت بازار مشي 

يعني ممكن ياخد 3 من خمسه

----------

تالت يوم في شيانغ ماي

رحنا النايت سفاري

وكانت رحلة لذيذة 

ويستحسن تروح بتاكسي لوحدك وتدفع على البوابه وتدخل

لان حجز الشركة مش حيجبلك غير التوصيل 

وهناك في النايت سفاري كله بيركب زي الطفطف 

 الطفطف اللى زي اللي موجود في المصايف بتاعت مصر 🚎

الطفطف بيلف في الغابه مفيش لا اسلاك حوالين الطفطف ولا اي حاجه 💀

وبتشوف حيوانات كتيره زي الاسد والنمر والدب والزرافه والغزال وتقدر تاكل الزرافه والغزال والحمار الوحشي 

كل ده بليل في عز الضلمة 👀

هات اكل وانت جاي عشان هناك الموزتين ب30 بهت ومحدش بيفتش

Night Safari Chiang Mai Thailand

وقبل اللفه بتاعت الطفطف فيه زي عرض كده مقفول في قفص لذيذ تبع التذكره متفتهوش

وممكن تتصور مع بيبي البومه ببلاش هناك 

-------

رابع يوم في شيانغ ماي 

كان نفسي اركب فيل فحجزنا رحله الفيل والرقاب الطويله

في الطريق عدينا على حديقة / معبد النمور 

معبد النمور في شيانغ ماي

عرض الفيل معجبنيش مع انه ممتع بس عشان حسيت انهم بيعذبوهم عشان يعملوا كده

وبعدين ركوب الفيل اللي كان حاجه خيالية وركوب عربيه يجرها تيران 

Elephant chiang mai thailand ركوب الفيل في شيانغ ماي تايلند

وبعدها رحنا لقرية الرقاب الطويلة

منصحش بحجزها هي مش قريه ولا بتاع

ديه ماركت وقاعد فيه ستات حاطين البتاع ديه حوالين رقبتهم ونظام باه اديهم فلوس وكده

حسيتهم fake اوي وندمت اني صممت عليها

Long Neck Villages in Chiang Mai thailand
قرية الرقاب الطويلة في شيانغ ماي تايلند

-------

اليوم اللى بعدها سافرنا الى بوكيت 

اول ما تطلع من المطار وتاخد التاكسي اللى جايبه من جرابي

( انا مسميه الابليكشن كده grap )

حتلاقي اللون اللاخضر مسيطر طبيعيا على بوكيت

 سبحان الله فعلا

فوكيت من الطيارة phuket thailand from airplane

رحنا الفندق اللى حاجزينه 

Paripas Patong Resort 

الفندق مكانه حلو اوي وسعره 

ست ليالي بـSAR 752 THB 6,912 

عجبني والبسين حلو جدا فيه وكل حاجه بصراحة عجبتني فيه 

فندق باريبا بوكيت تايلند

---------

اول يوم في بوكيت 

رحنا رحله جيمس بوند

وتاني يوم 

رحله في في ايلاند

جزر في في ايلاند وجيمس بوند فوكيت تايلند
phi phi island and james bond in phuket thailand

وتالت يوم نزلنا البسين في الفندق 

------------

ورابع يوم رحنا عرض الفانتازي Fantasea phuket thailand

 عرض الفانتازي Fantasea phuket thailand

 عرض الفانتازي Fantasea phuket thailand

------------

وخامس يوم ركبنا تاكسي عشان نروح البانجي جامب وطلع مسلم وراجل محترم

واتفقنا معاه انه يلف بينا على مزارات ب 500 بهت

وكانت مصنع العسل بتروح زي مكان بيبيع عسل وطعمه تحفه الصراحة ومنتجات معموله من العسل

ورحنا مصنع الكاجو

نفس النظام

ورحنا البانجي جامب وجوزي عمل النطة وهي مرعبه الصراحه وعاليه اوي بس ممتعة

وانا رحت السيارات 

واتبسطت فيها اوي

وبعدها رحنا الzip line

وجوزي عملها واتبسط فيها برضه واللي شغالين هناك اخدوا ليه كذا صوره حلوين 

وبعدها كنا حنروح الجراند بوذا بس سبحان الله 

ربنا مش كاتبلنا نشوف اصنام 👆

الدنيا من اول اليوم كل ما نقول نروح لعم بوذا تمطر جامد جداا

نغير ونروح مكان تاني المطر يقف

فقررنا منرحش اي حاجة فيها بوذا 

--------

بعدها اخدنا طيارة ورجعنا على بانكوك 

رحنا بليل ترمنال 21 مول

فاشل وغالي على الفاضي ومش مميز يعني 

مشترناش حاجة

----- 

اليوم اللى بعدها مكناش عارفين حنعمل ايه 

بس صاحب زوجي اتصل بيه وقاله فيه ركوب عجل مجموعة عاملينه وكده

وطبعا اترددنا عشان البيبي معانا

بس انا قررت اني حلبسه في الشيالة ورحنا

اتجمعنا عند محطة مترو

واتقسمنا وركبنا تكاسي وطبعا كل الفلوس بتتقسم على العدد

وبعدها ركبنا معديه 

واول منزلنا لقينا محل بتاع عجل (دراجة )  وموتوسيكلات

وطلعت فكره الشيالة فاشله

بس ربنا سهلها ولقيت دراجة فيها باسكت من اودام حطيته في الشيالة وحطيته فيها ونفع

Sri Nakhon Khuean Khan Park And Botanical Garden

البرنامج كان اننا حنطلع على الغابه وبعدها السوق العائم وبعدها الحديقة 

بس كان في المجموعة واحد مصري تاني وقالنا فالغابه فيه جسر رفيع اوي وصعب تمشوا بالعجل ومعاكوا بيبي

فطلعنا بالعجل على حديقة اسمها

Sri Nakhon Khuean Khan Park And Botanical Garden

جنب المكان خمس دقايق 

ولفينا فيها

وبعدها رحنا الماركت كان بعيد شويه 

ومش عائم ولا بتاع هو فيه زي بركه طويله كده وعلى الناحيتين ناس فارشين حاجات كتير بيبيعوا

مشترناش حاجة وريحة الاكل ايييييييف يعني

بس الحمدلله كان فيه محل بيبيع اكل حلال

والراجل اللى فيه جميل وبيعرف عربي شويه 

وبصراحة ارتحت واكلت رز وفراخ

بعدها رجعنا الفندق مهدودين وغرقانين عرق وتعبانين ومكسحين بقالنا زمن مركبناش عجل

الحمدلله ان ربنا سترها وموقعتش بالنونو 👼

---------

اليوم اللى بعدها سافرنا 

خلاص بح كده 

-----------------------

اللي حجز طيران ميقراش اللى جاي

اللى اخد التاشيرة ميقراش اللى جاي

اللى هناك فعلا ميقراش اللى جاي

اللى سافر كل حته وفاضل تايلند ميقراش اللى جاي

غير كده تعالي اقرا باه يا معلم

***********

تايلند من وجهه نظري

البلد الرطوبه فيها بشعة

فاللى مش بيحب شهر تمانية في مصر واللى بيعرق كتير ميرحش مش حيتبسط اوي 

الاكل الحلال كان الحمدلله بنلاقي 

بس قرف يعني وانت ماشي شايف الاكل وعمال تسال حلال ولا لاه وقليل اما بتلاقي 

والمطاعم الحلال العربي بتستهبل استهبااااااااال بسبب الخلايجة  والاسعار عاليه اوووووووووووي

البلد ملياااااااااااااااانة اماكن مساج وكلها لمؤاخذه يعني انا شفت من وانا ماشيه في الشارع قرف 😤

فمابالك اللى بيخش

وعادي تحجز رحله يطلعلك المرشد مطول شعره ومخنس وحاجة اخر كاكا 💩

يعني بتبقى هاين عليك تتف عليه وتقوله مش طالع 

احسن ناس كانوا اهل شيانغ ماي 

اهل بوكيت: جشعين 

وفيه في بوكيت مسلمين حتشوفهم بس للاسف مش كتير

وكل المحلات البياعين هنود ويقرفوا بصراحة كرهوني في الهنود

واكتر الرحلات فيها ازواج هنود شهر عسل وعائلات

فينك يا ريتيك فينك يا شاروخان 👳

اهل بانكوك: زي اي بلد كبيرة اهل مدينة

بوكيت رحلات الجزر فيها شرم الشيخ والغردقة والساحل ومرسى مطروح يضربوها بالجزمة

ليه

الشعب في الجزر بتاعت بوكيت ميته والميه وسخة والشركات 

بتنصب عليك مش بتروح ال7 جزر المتفق عليها

ونظام اقلب العميل بسرعه

الرحلة لتايلند غاليييية مش رخيصة

فقبل ما تقرر تروح تايلند مترفعش امالك اوي

لازم تعمل سيرش كويس وتعرف انت حتصرف كام 

وعايز ايه من الرحلة

تايلند بالنسبالي رحلة مره واحدة

يعنيمصر وتركيا بالنسبالي احسن منها ميت مره

...

انا بحب الحاجة تكون احسن حاجة وخصوصا لو دافعه كتيييييييييييير

واللى حيقول شوبنج الاسعار هناك زي مصر واغلى كمان

ومصر فيها اكتر بكتيييييييير والخامات احسن واضمن

----

من الاخر لو كل الفلوس اللى معاك حتطلع بيها تايلند

وانت مسافرتش بلد تانية ولفيت 

الغي تايلند وروح بلد احسن منها

وخليها اما يبقى معاك فلوس زايده عن حاجتك 😂😂

او تكون لفيت كتير وهي خليها بعدين