رحلتي الى تركيا... الانتقال من المطار الى الفندق في اسطنبول

وصلنا الحمدلله الى مطار صبيحة 

الساعة 1 ظهرا

وعشان مكانش معانا غير شنط ظهر 

كل واحد شايل هدومه

فكان الموضوع اسرع واسهل

بنعدي على الجوازات بيشوفوا التاشيرة علي الباسبور

وختم وبقينا في تركيا

مشينا ناحية بوابة الخروج 

ولقينا فيه فودافون وشركة تانية للاتصالات والانترنت

بس مخادناش لاننا مش محتاجين نكلم حد والنت في كل الفنادق 

واحنا مصدقنا بعدنا عن الدوشة والاخبار المملة والمتكررة

طلعنا وزي ما كنت قريت عن باصات هافاتاش

اللى بتقف اودام المطار

رحنا للسواق سالناه بتروح كاديكوي وبتقف عند الميناء؟

ايوه

بكام  ؟

8 ليرة

يابلاش 

ركبنا الاتوبيس 

بصراحة اتوبيس نظيف جدا انظف من شركات النقل في مصر بين المحافظات

( سوبر جيت وجو باص )

اتحسرت.. بس نسيت اول ما مشي الاتوبيس،

وشفنا الجبال الخضراء والنظافة والشوارع اللى مفهاش مطبات

ايه الناس ديه !!

عايشين ازاي من غير حفر ومطبات في الشوارع

وايه الالوان اللى في السما والارض ديه

سبحان الله.

من اول وهلة قلبك كده ينشرح 

(مش زي السعودية اول ما جيت جالي اكتئاب وحسيت اني اترميت في الصحرا

ورحت نمت في العربية اللى بتوصلني عشان مشوفش اكتر من كده

فرق واي فرق )

وصلنا بعد ساعة الا ربع الى ميناء كاديكوي

وسالنا فيه عبارة الى ميناء امينونو وطلع فيه

طيب انا كنت بفكر يا حبيبي نروح جزر الاميرات بيوك اضا

عشان ميضعش اليوم

سالنا طلع مفيش من الجزيرة لامينونو 

فطارت الفكرة

:(

ركبنا العبارة بـ3 ليرة

ومشيت حاجة كده زي المسلسلات التركي

والبطل والبطلة قاعدين علي الدكك بتاعت العبارة والبحر وراهم

وكأن الدنيا كلها وقفت ومفيش غيرهم

بصراحة احساس جميل جدا ومناظر حلوة

وطبيعة خلابة

انا نسيت كل حاجة 

وقعدت استمتع مع حبيبي 

<3

نزلنا في ميناء امينونو لقينا اودامنا محطة الاتوبيسات اللى بتودي لاغلب الاماكن

والترام اللى بيروح كاباتاش ومنه يتراح لميدان تقسيم

وبما ان الفندق قريب قررنا ناخدها مشي عشان نكتشف المنطقة

حوالي 15 دقيقة مشي للفندق عشان بنسال ومش عارفين لسه

هي عامة بتاخد 10 دقائق

والمشي متعة وسط اهل اسطنبول وعلى ضفة ميناء امينونو

وجنب جامع امينونو الجديد

وشايفين من بعيد الجامع الازرق الشهير

- جامع السلطان احمد -

وصلنا الفندق عملنا شيك-ان وطلعنا واتصدمنا

---------

** النقل من مطار صبيحة الى ميناء امنيونو اتكلف للواحد في ابريل 2014 

11 ليرة تركي

8 ليرة باص هافاتاش من امام المطار بالظبط الناحية التانية الى ميناء كاديكوي

ومن ميناء كاديكوي 3 ليرة الى ميناء امينونو

** هناك طريقة تانية وهي ركوب الباص الي ميدان تقسيم ومنه الانتقال الى ميناء امينونو

** من الافضل تحويل الاموال اللى معاك الى ليرة ويورو فقط فاكثر الاماكن تفضل تلك العملات ولا تقبل عملات اخري

سعر التحويل في المطار مقارب للسعر المعلن والفرق مش كبير بس يستحسن تحول من بلدك

** احلى حاجة في السفر انك تستكشف بناء على معرفتك وتتجول وتجرب حاجات جديدة وتستغل كل الوقت ومتستسهلش وتركب التاكسي

لان سعره غالي جدا عشان سعر البنزين في تركيا عالي جدااا

**منطقة أمينونو
Eminonu
منطقة أمينونو أشهر مناطق اسطنبول على الإطلاق
وتعتبر مركزاً استراتيجياً فهي منطقة، والسواح يفضلون هذه المنطقة بعبقها التاريخي وطقوسها الخاصة وتقاليدها العريقة ، وبها محطة الباصات الرئيسية التي توصل إلى كل مكان في اسطنبول كما أنها تقع مقابل السوق المصري، إضافة إلى كونها قريبة
من منطقة السلطان أحمد وآيا صوفيا والتوب كابي هذا بالإضافة إلى أنها
ميناء يوصل إلى كثير من مناطق اسطنبول خصوصاً التي تقع على الجانب الآسيوي
كما تخرج منها رحلات خاصة في البوسفور
ويوجد بالمنطقة مطاعم الأسماك الشهيرة والتي تبيع ساندويتش السمك
الذي أرتبط اسمه بمنطقة امينونو ووحشة ومتستاهلش بيحط حته صغيرة وسلطة كتير في عيش كبير بس جربوه عشان تبقوا جربتوه هو ب6 ليرة