اليوم الثالث : منطقة القرن الذهبي:
مينياتورك Miniatürk ***
مينياتورك Miniatürk اسطنبول istanbul
تذكره الدخول 15 ليره = 70 جنيه
هي عبارة عن مجسمات لاشهر معالم تركيا
المجسمات بنسبة ٢٥\١ من حجمها الحقيقي ودقيقة جدا
بالإضافة إلى شرح مسجل صوتياً على كل مجسم بيشتغل لما تمرر بطاقة خاصة جنبه
من الحاجات الجميلة اللى فيها ستاد كوره واودامه فيه اغنيه كل فريق من فرق تركيا المشهوره
فيه مطار وطيارات مجسمه
فيها مطعم للاكل وفيها تصوير بلبس التركي
وجولة محاكاة بالهليكوبتر روووووووووووعة وانصح بيها جداااااااااااااا ***
الجوله ديه موجوده في اماكن تانية زي
1_ فوروم مول Istanbul Forum
2_ متحف بانوراما 1453
3_ سفير مول
ازاي تروح مينيا تورك
اتوبيس من تقسيم 36T 38T حينزلك اودامها تعدي الشارع
اتوبيس من امينونو 47 47E 47Ç
مصاريف مينيا تورك 15 ليره دخول و2.3 ليره مواصلات = 80 جنيه
تلفريك السلطان ايوب ***
يقع على تلة بيرلوتي المزينة بالاشجار الجميلة
ومن اعلى التلة يمكنك رؤية البوسفور ومشهد القرن الذهبي ليلاً مع كوبايه شاي
للوصول الى تلفريك ايوب وجامع السلطان ايوب
اذا كنت تسكن في السلطان احمد تركب الترام من محطة السلطان أحمد إلى محطة امينونو 2.3 ليرة
ثم ركوب العبارة الى السلطان أيوب 2.3 ليرة ، ثم التوجه إلى طريق الجامع تصل إلى التلفريك
او الذهاب الى محطة امينونو وتركب الباص ( الاتوبيس ) 2.3 ليرة
36CE48E9999Y
تقع المحطة خلف الجامع وتكلفة تلفريك ايوب بكارت اسطنبول 2.3 ليره
حلو لو مش حتروح رحله بورصه وتركب تلفريك بورصه
وحتي لو حتروح تلفريك بورصه روحه بليل برضه تغيير عن منطقة تقسيم وامينونو
تكلفة منطقة السلطان ايوب وتلفريك بيرلوتي
2.3 الترام +2.3 الذهاب + 2.3 التلفريك +2.3 الرجوع
2.3*4 = 9.2 ليره = 42.5 جنيه
تكلفه اليوم الثالث :
اكل ومياه معدنية وشاي وسميط و ... 54 ليره = 250 جنيه
80 جنيه مينياتورك + 50 ايوب + 250 اكل = 390 جنيه
4635 - 390 =4245 جنيه
-----------------
اليوم الرابع :
قصر دولمه بهجة وغابات بلغراد
قصر دولمه بهجة اسطنبول Dolmabahçe Palace istanbul
اليوم ده جاااااااااااااامد جدا القصر ده من اجمل القصور والغابات ديه حتبقى عايز تجيب خيمه وتبات فيها
من كتر جمال الطبيعه وسحر الاشجار حتحس انك دخلت لوحه فنيه او جنه الله على الارض
حاله من الهدوء والطمانينه والسلام النفسي حتحس بيها
انا حبتها وبالرغم اني رحتها بس لو رحت اسطنبول تاني هي من اول الحاجات اللى لازم اعملها تاني
قصر دولمة بهجة
قصر السلاطين او قصر دولمة بهجة
ودولمة باهجة تعني حرفياً باللغة العربية "الحديقة المردومة"
ووالاسم جاي من ان الأرض التي اتبنىعليها القصر اتردمت عشان على شاطئ البوسفور
وبُني بأمر من السلطان عبد الحميد الأول واستغرق بنائه فترة مابين 1843 1856 م
زين القصر بحدائق أزهار وأشجار كبيرة وكثيفة وقد ضمّ القصر 285 غرفة و46 قاعة
ممكن تاخد جوله في حديقة القصر وتستمتع بمشاهدة برك الماء والمساحات الخضراء التي تغطيها الازهار الملونة
وبرج الساعة وهو من معالم القصر
زيارة قاعة الكريستال التي تضم أكبر ثرية كريستال في العالم
حيث تزن ما يقارب 5 أطنان وقد قدمت كهدية من إحدى الملوك.
زيارة باقي قاعات وغرف القصر والتعرف على غرفة أتاتورك
وقد خصصت هذه الغرفة لمؤسس الجمهورية التركية الحديثة مصطفى كمال أتاتورك حيث توفي فيها عام 1938م. ( حصة تاريخ اتاتوركي )
متنسوش زيارة متحف الساعات القديمة اللي كانت موجودة في اشهر قصور اسطنبول في قصر دولمه بهجة
قصر دولمة بهجة متاح للزيارة من الساعة 8:30 صباحاً حتى الساعة 17:00 مساءً بتوقيت اسطنبول.
العطل : يوم الإثنين والخميس و الأعياد الرسمية.
بعد الانتهاء من زيارة قصر دولمه بهجة ممكن تاخد شاي في مقهي القصر المطل على البوسفور
وممكن تتمشى وتعدي على منطقة وميناء بشكتاش المليان مطاعم وقهاوي على البحر
تذكره قصر دولمه بهجة ضمن بطاقة المتاحف
المواصلات من والى القصر
2.3*2 = 4.6 ليره =22 جنيه
غابات بلغراد:
غابات بلغراد اسطنبول belgrad forest istanbul
تعتبر اجمل واكبر منتجع طبيعي في اسطنبول
تمتد غابات بلغراد على 5300 هكتار وهي محمية طبيعيه
واكثر الاماكن المفضلة لهواه المشي وركوب الدراجات
حاجة كده اخضر في اخضر تبص كده تلاقي اشجار بلوط
تبص كده تلاقي اشجار كستناء وزان
وياسلام على النفس النقي اللى عمرك ما حتتنفسه وانت في وسط مدينة
شم يا خويا شم بدل البيبي اللى بنشمه 🌄
جواها سبع بحيرات في وسط الروعة والجمال
وانت بتتمشى عدي على مشتل اتاتورك واتفرج على تغير الشجر اللى بيتلون في كل فصل من فصول السنه
المشتل مفتوح كل يوم ماعدا السبت والحد
الدخول للغابات ببلاش وقت ما انا روحت وكان في نوفمبر ومكانش فيه انشطة
بس شفت عرائس بتتصور اتوقع الانشطة بتبقى في الصيف
والانشطة الموجوده في غابات بلغراد هي ركوب الدراجات وركوب الخيل والبيتش باجي
طريقة الذهاب لغابات بلغراد
المترو خد المترو الاخضر من ميدان تقسيم وانزل بعد 10 محطات محطة M2Hacıosman
واطلع منها حتلاقي محطة اتوبيسات خد اتوبيس 42HMBahçeköy انزل اخر الخط
في الرجوع اخدنا اتوبيس42T
اللى مش حيسافر الشمال التركي لاااااااااازم يروح غابات بلغراد
الموصلات لغابات بلغراد
2.3 مترو + 2.3 اتوبيس + 2.3 اتوبيس الرجوع = 6.9 ليره = 32 جنيه = 35 جنيه
اكل ومياه معدنية وشاي وسميط و ... 54 ليره = 250 جنيه
مصاريف اليوم الرابع
235 اكل + 35 غابات بلغراد + 22 قصر دولمة بهجة = 307 جنيه
4245 - 307 = 3938 جنيه
اليوم الخامس
قصر بيليربي وتل العرائس ومنطقة اسكوادور
قصر بيلربي Beylerbeyi Palace ***
قصر بيلربي يقع على البوسفور مباشرة في الجانب الآسيوي من اسطنبول
ومعنى كلمة بيلربي في اللغة العربية أي سيد الأسياد ( سيدنا السيد 👨 )
تكتسي أرضيته بالسجاد الأحمر الفاخر، كما أن غرف القصر تتزين بالثريات الكريستالية الفرنسية الرائعة
(هو البتاع المترجم بيقول كده في وداني 👂 )
 |
| قصر بيلربي اسطنبول Beylerbeyi Palace |
(على الباب حيدوك سماعه وجهاز تعلقه في رقبتك وحياخدوا الباسبور رهن
ده بيترجم عند كل اثر واوضه ايه اللى انت بتعدي من عليه)
القصر جميل وموقعه حلو اوي بس لو انت مش غاوي قصور ورحت دولمه بهجة ممكن تفوته
بس لو معاك وقت روح واستكشف القصر والمنطقة اللى حواليه ( روحه روحه حلو حتنبسط صدقني)
بعد القصر حتطلع تاخد ميكروباص يوديك
تل العرائس Çamlıca Hill **
تل العرائس Çamlıca Hill اسطنبول istanbul
هي تله خضراء بتبين اسطنبول كلها والبوسفور المنظر من فوق ساحر
ويعتبر بيكنيك لذيذ بس المطلع بعد متنزل من الميكروباص عااااااااااااااااااااااااااالي ومتعب
فلو مش بتحب المرتفعات ممكن تفوته هو مفهوش ابهار
طريقة حساب مواصلات اليوم الخامس
ميكروباص من تقسيم الى اسكودار 7 ليره
وتنزل تكمل بميكروباص للقصر 3 ليره
= 10 ليره = 46.5 جنيه
او تاخد اتوبيس لامينونو 2.3 ليره
وتنزل تاخد معديه لاسكودار 2.3 ليره
وتاخد من موقف اتوبيس اسكودار اتوبيس لقصر بيلربي 2.3 ليره
= 6.9 ليره = 32 جنيه
من قصر بيلربي لتل العرائس ميكروباص 3 ليره
+ الرجوع بميكروباص من تل العرائس الى موقف اتوبيس اسكودار 3 ليره
+ معديه لامينونو 2.3 ليره + اتوبيس او ترام للفندق 2.3 ليره = 35.5
اجمالي المواصلات والاكل لليوم الخامس منطقة اسكودار
الذهاب لقصر بيلربي 46.5 جنيه
+ الذهاب من قصر بيلربي لتل العرائس 32 جنيه
+ الرجوع من تل العرائس 35.5 جنيه
= 114 جنيه
+ اكل ومياه معدنية وشاي وسميط و ... 54 ليره ( 250 جنيه )
= 364 جنيه
3938 - 364 = 3574 جنيه
اليوم السادس
رحله الى جزيره الاميرات ***
جزر الأميرات تتكون من 9 جزر قبالة الساحل الآسيوي في اسطنبول، في بحر مرمرة
وللذهاب الى الجزرهناك نوعين من العبارات وهما العباره العادية للركاب وعبارات الركاب السريعة (الحافلة البحرية)
وتذهب العبارات الى 4 من الجزر من ميناء سيركجي في امينونو ومن كاباتاش بجانب تقسيم
ويفضل الذهاب من امينونو
وتعرف هذه الجزر باسم أدالار (جزر) باللغة التركية
وأسمائها هي بويوكادا، هيبيليادا، بورغازادا، و كيناليادا
اسم الجزر يأتي من الفترة البيزنطية، عندما تم نفي الأمراء والامبراطوريات هناك
ولكن خلال الفترة العثمانية، وخاصة في القرن التاسع عشر مع استخدام البواخر،
أصبحت هذه الجزر منتجعات شعبية لأغنياء اسطنبول، وتم بناء منازلهم الخشبية.
وكانت المجتمعات اليهودية واليونانية والأرمنية جزءا كبيرا من سكان الجزر
والان وتعتبر هذه الجزر هي الوجهات السياحية الاكثر شعبية للرحلات اليومية
تقدر تعمل ايه على جزر الاميرات
الاول افضل جزيره هي الجزيره الكبيره بيوكادا الاخيره يعني تنزل اخر محطه
وهناك تقدر تاجر كارته تاخدك لمكان عالي حتشوف فيه خيول وتقدر تنزل تتصور
وانت طالع حتشوف بيوت خشبيه مملوكه من اهل الجزيره
وتقدر تاجر عجل وتكتشف الجزيره
وتقدر تاخد غذا من سمك في مطعم من مطاعم الجزيره
سعر العباره العاديه اتجاه واحد 3 ليره بتاخد ساعتين ونص
وسعر العباره السريعه اتجاه واحد 7 ليره بتاخد ساعه
مواصلات واكل اليوم الخامس
ترام او اوتوبيس لامينونو 2.3 ليره *2 = 4.6 ليره = 25 جنيه
+ العباره السريعه 7 ليره * 2 = 14 ليره = 65 جنيه
+ اكل ومياه معدنية وشاي وسميط و ... 54 ليره = 250 جنيه
= 340 جنيه
3574 - 340 = 3234 جنيه
( ممكن وانت راجع تنزل ميناء كاديكوي المعديه حتعدي عليه واتمشي هناك الجو لذيذ اوي )
اليوم السابع
رحله الى بورصه ***
اماكن يمكن زيارتها في بورصه
- جبل اولداغ وتليفريك بورصه
- القريه العثمانية
- الشجرة المعمرة
انا مزرتش غير جبل الاولداغ ومكانش عندي وقت ازور حاجه تانية
يدوب كنت بلحق اخر معدية للرجوع لاسطنبول
كان من كام سنه اقدر اقول اطلع بورصه لوحدك حتوفر تاخد المعديه تروح تركب اتوبيس تنزل تاخد التليفريك وتطلع الجبل وتروح تتزلج على الجليد لو بتعرف او تاخد شاي وتحاول تتزلج برضه
بس السنه ديه الموضوع باه غالي ومكلف فانصح تطلع مع رحله
حتعمل انشطه اكتر وحتوفر كتيييييير
والرحله بتكسب من انها توديك مصنع العسل ومصنع الحلقوم يعني انت روح الرحله ومش لازم تشتري
او لو عايز الطريقة تروح ازاي فهي كالتالي:
تركب اتوبيس او ترام لميناء امينونو اسال على شباك بورصه
اقطع تذكره ذهاب فقط عشان ممكن تقطع تذكره رجوع ومتلحقهاش وساعتها حتروح عليك وتضطر تدفع تاني
لازم يبقى معاك الباسبور عشان بياخدوا منه البيانات ومش حتعرف تركب المعديه لبورصه غير بالباسبور
تكلفه المعديه اتجاه واحد 28 ليره = 130 جنيه * 2 = 260 جنيه
حتنزل حتلاقي ماكينة كل الناس واقفه عندها عشان تشتري كارت المواصلات بتاع بورصه
ايوه للاسف غير كارت اسطنبول والباص مش حينفع تاخده غير بالكارت ده مفيش كاش
بعدين تاخد الباص اللى رايح التليفريك حتنزل اخر محطه
اقطع تذكره التليفريك فيه لحد فوق وفيه لحد النص خد اللى فوق
واطلع اخر التليفريك واتمشي شويه حتلاقي التزلج على الجليد تقدر تاجر زلاجات وتستمتع
تذكره التليفريك للاخر 38 ليره = 175 جنيه
الرحله بتتكلف حوالي 130 ليره لحد 150 ليره تبع الشركات
لو لوحدك حتكلفك حوالي 13 ليره
 |
| رحله الى بورصه جبل اولوداغ uludag bursa turkey |
مصاريف اليوم السابع
100 ليره مواصلات وتليفريك بورصه = 465 جنيه
اكل ومياه معدنية وشاي وسميط و ... 54 ليره = 250 جنيه
3234 - 465 - 250 = 2519 جنيه
اليوم الثامن
رحله سابانجا ومعشوقيه
احسن حاجه تطلعها مع شركه حتعمل حاجات كتير وحتوفر عليك وقت حيضيع في التنقل بين المواصلات
وحتكلفك اكتر
تكلفه الرحله بتبقى حوالي 120 ليره = 555 جنيه وانت وشطارتك لو شاطر ممكن تنزلها شويه
كانت شامله زياره فاخر الرحله لاكواريوم في مول اعمار اسطنبول
ميزتها انك لو مش حتروح شمال تركيا فالرحله فيها حاجات حلوه زي مناظر طبيعيه وبحيره
ونشاطات زي الزيبلاين وركوب بيتش باجي في منطقة زي غابه على جبل عالي
وفيه برضه نط من فوق الجبل بس ده غالي شويتين
الرحله تكلفتها كبيره بس ممكن تفوت منها حاجات وممكن تفوتها كلها هي حلوه اوي للي مراحش الشمال التركي
2519 - 555 = 1964 جنيه
الباقي حيفرقوا فيه المواصلات والاكل ولو عايز تزود فندق يكون اقرب او مستواه احسن
وبرضه لو الطيران مكانش بالسعر ده
شفت باه
