1- عشان نشيل قشر البطاطس بعد السلق مباشرة حطوها في ماية ساقعة .. لان لو استنيتي عليها لما تبرد و قشرتيها هتغلبك برضو في شيل القشر
2- لو الاكل اتحرق .. ( اتلسع يعني مش راح في داهية خالص )تروحي تحطي حلة اكبر من الحلة الملسوعة في الحوض و تفتحي عليها الماية و و تجيبي الحلة المصابة و تغمسيها غمس كده في فى الماية الباردة الي نزلت من الحنفيه عشان نلحق ان ريحة الشياط متكملش على بقيه الاكل الي في الحلة و تبقي الاكله كلها باظت .. و بعدين تنقلى الاكل في حله تانية واوعي تكحتي بواقي الاكل في في الحله من تحت يبقي معملناش حاجة يا شابة
3- عشان تنضفى النجف او اي كريستالات
هتجيبي قماشة ناعمة و تغمسيها في طبق صغير يكون فيه ماية دافيه على معلقتين كبار خل و شوفى النتيجة .
4 - عشان تحافظي على لمعان الفضية مدة اطول
حطي صباع طباشير في درج الفضيات عندك مع المعالق و الشوك و السكاكين .. ليه بقي ؟؟!! لان الطباشير كمادة مصنوعة بيساعد على تشرب الرطوبة
5-عشان ادوات المائدة تفضل بتلمع و جديدة
جمعيها كلها و انقعيها في طبق بلاستيك كبير فيه ماية على مبشور صابون .. اي صابونه عندك بتودع الحياه ابشري الحته الباقيه منها في الطبق مع شوية نشادر مش كتير و بعدين اغسليهم بسفنجة مش بسلك و اشطفيهم
6 - اما عن مشكلتنا الازلية الاجزاء الي بين السيراميكا و التانية في المطبخ او الاحمام الي بيصعب تنضيفها
بصي يا ستي .. هتجيبي فرشة اسنان قديمة .. و تجيبي طبق ضغنون كده تكوني بتستخدمية في التنضيف مش الاكل . و تحطي شوية ماية و شوية كلور
هتيجي على الاماكن الصغيره دي و تغمسي الفرشة في الطبق و تروحي على الاماكن و تدعكي . هتلاقيها بقت ولا الجديدة
ليست هناك تعليقات:
إرسال تعليق